HAK-ho Parseiru Estratéjiku Realiza Programa Auditória Sosiál Liu Husi Diskusaun Kartaun Pontuasaun Komunidade (KPK) iha Suku Fatumasi

Vice Diretór Sr. Antonino de Limas, iha ninia intervensaun HAK nu’udar organizasaun ne’ebé luta ba direitus umanus desde tempu okupasaun Indonézia tau matan no defende direitu prizioneirus polítika Timor-oan, ohin loron Timor-Leste hetan ona ninia independénsia HAK kontinua luta ba direitus umanus ho ninia dimensaun ne’ebé luan. Tuir konstituisaun RDTL atu hakonu direitu ekonómia sosiál no kultura -EKOSOK liu-liu ba asuntu bee moos nu’udar dereitu báziku ba ema nia moris no Estadu Timor-Leste  asina ona konvensaun internasionál ba direitu asesu bee moos nu’udar direitu umanus ho nune’e Estadu iha orbigasaun atu proteze no hakonu direitu sidadaun sira nian, maibé sidadaun sira mós dever  obrigasaun no responsabilidade ba fasilidade públiku sira ne’ebé Estadu hakonu ona hodi garante ninia sustentabilidade ba tinan naruk .

Bee nu’udar direitus Umanus iha kontistutisaun hatur ona sidadaun sira nia direitu asesu ba Edukasaun, Saúde no direitu ba asesu bee, direitus umanus ema hotu tenke asesu ba bee moos, Estadu iha orbigasaun hodi hakonu dereitu sidadaun sira nian, komunidade sira mós iha dever no obrigasaun atu responsabilidade ba kuidadu  fasilidade públiku sira ne’ebé Estadu hakonu ona. 

Parseiru sira hamutuk ho Governu lokál hakonu ona direitu sidadaun sira nian hodi instala ona sistema bee moos maibé observasun HAK ho Parseiru nian haree no hetan informasaun husi GMF hateten sistema sira ne’e durasaun tinan rua a’at ona tanba komunidade suku Fatumasi laiha jestaun no kuidadu ho di’ak, nune’e husu ba komunidade sira presiza tau matan ba sistema bee sira ne’ebé kanaliza ona liuhusi parseiru internasionál sira tanba bee ne’e benefisiu ba komunidade sira.

Observasaun HAK, FHTL no GFFTL haree iha Sistema Metir komunidade balu mak asesu bee de’it ne’e tanba la halo jestaun ba bee ho di’ak no hetan mós estraga husi dezastre naturais iha tinan 2021, Aldeia Metir iha uma kain 9 hamutuk Aldeia Bazartete mak asesu bee moos no komunidade sira iha Metir balu la asesu ba bee, Aldeia Bazartete komunidade sira dada bee privadu ba uma, uma kain balu la hetan ba fornesementu bee moos no uma kain balu tenke sosa fali bee iha Liquiça villa, komuidade sira seidauk iha kuñesementu ba kuidadu fasilidade  públiku sira ne’ebé mak Estadu ho parseiru sira instala ona.

Jestór Programa WaterAid Sra. Livia da Cruz, iha ninia intervensaun surumutu ne’e hodi diskuti kona-ba situasaun real sistema bee iha komunidade, asuntu mudansa klimatika no partisipasaun feto iha estrutura GMF. Objetivu Kartaun Pontuasaun Komunidade-KPK reprezentante feto mak tenke barak, iha diskuasaun ne’e saida maka atu hetan identifika problema ba sistema bee, operasaun manutensaun no Estrutura GMF, oinsá bele haree hamutuk hodi sai pontu importante iha nivél suku hodi tau iha planu prioridade.

Informasaun Relevante : Kondisaun Atual Bee Moos iha Munisipiu 8 Periodu 2022-2023

Sefi Suku Fatumasi, Sr. Elizario Freitas, iha ninia intervensaun, agradese ba HAK ne’ebé mak halo ona koordenasaun ho autoridade lokál hodi indentifika ba problema komunidade sira nian liu-liu ba iha bee moos, Suku Faumasi problema ril mak bee moos. Iha postu Bazartete bee moos sei sai nafatin preokupasaun tanba komunidade balu presiza bee ba nesesidade sira tenke sosa, programa KPK ne’ebé HAK ho Wateraid aprezenta ne’e sai ona planu ba suku Fatumasi nian, hanesan autoridade iha resposabilidade  sei servisu hamutuk ho Postu Administrativu Bazartete no parseiru sira hotu hodi hatan no rezolve ba problema sira ne’ebé mak sai preokupasaun ba komunidade sira liu-liu bee moos mak sai  prioridade .

Administrador Postu Administrativu Bazartete, Sr. Miguel dos Santos iha ninia intervensaun, agradese ba HAK no  WaterAid ho ninia parseiru sira hotu ne’ebé lori ona programa Kartaun Postuasaun Komunidadde-KPK ne’e mai iha Suku Fatumasi, bee hanesan nesesidade importante tanba sai ona prioridade ba ema nia moris no balada sira ho nune’e haree ba  programa ne’e di’ak tebes, tempu uluk bee sira ne’e kanalizasaun di’ak, maibé ohin loron kondisaun sira a’at hotu ona liu-liu fasilidade públiku tanke no kanu sira, nune’e ohin loron komunidade sira susar asesu ba bee moos, sintina la ijiene no bee laiha hodi fó impaktu ba komuniade sira nia saúde. Governu instala ona fasilidade públiku sira maibé dalaruma komunidade balu laiha resposanbilidade  ba kuidadu fasilidade públiku sira no komunidade sira la halo jestaun ba bee ho di’ak. Iha Suku Fatumasi bee husi Postu Saúde mak kanaliza fali ba Postu Administrativu no Esquadra Polísia hodi asesu. Hanesan autoridade postu nafatin fó hanoin ba komunidade sira atu kuidadu sasan sira ne’ebé Estadu hakonu ona, programa ne’e sai prioridade nune’e husu ba komunidade sira atu partisipa ativu.